Ռուսաստանի դեմ պատժամիջոցների օրինագիծը բավարար աջակցություն ունի ԱՄՆ Սենատում․ Axios

Հանրապետական սենատոր Լինդսի Գրեհեմի հեղինակած՝ Ռուսաստանի դեմ պատժամիջոցների խստացման օրինագիծն արդեն ունի ավելի քան 60 համահեղինակ, ինչը բավարար է այն ԱՄՆ Սենատում ընդունելու համար։ Այս մասին հայտնում է Axios-ը։

Պարբերականի տվյալներով՝ օրինագիծը նախատեսում է 100% երկրորդային մաքսատուրքեր սահմանել այն երկրների նկատմամբ, որոնք կշարունակեն գնել ռուսական նավթն ու գազը։

Axios-ի աղբյուրի փոխանցմամբ՝ փաստաթուղթն այս պահին ունի առնվազն 61 համահեղինակ՝ 39 հանրապետական և 22 դեմոկրատ։

Հուլիսի 16-ին Սենատի հանրապետական ղեկավարությունը սկսել է այսպես կոչված «hotline» ընթացակարգը՝ ոչ պաշտոնական հարցում անցկացնելով հանրապետական սենատորների շրջանում՝ պարզելու, թե արդյոք կան առարկություններ օրինագիծը քվեարկության դնելու վերաբերյալ։ Սա վկայում է, որ ղեկավարությունը ցանկանում է հնարավորինս արագ առաջ տանել նախաձեռնությունը։

Սենատում օրինագծի նոր տարբերակը ներկայացնում է նաև դեմոկրատ սենատոր Ռիչարդ Բլումենթալը։ Փաստաթուղթը Սենատից հետո պետք է հաստատվի նաև ԱՄՆ Ներկայացուցիչների պալատի կողմից։

Ավելի վաղ CNN-ը հայտնել էր, որ ԱՄՆ նախագահ Դոնալդ Թրամփը պատրաստ է աջակցել երկկուսակցական այս օրինագծի ընդունմանը։