Հանտավիրուսը տարածվում է․ վարակվածների թիվն աճում է․ նոր տվյալներ

MV Hondius զբոսանավի վրա բռնկված հանտավիրուսի դեպքերը շարունակում են մնալ համաշխարհային առողջապահական կառույցների ուշադրության կենտրոնում: Տեներիֆե կղզի ժամանած նավի վրա վարակը հաստատվել է ութ անձի մոտ, որոնցից երեքը մահացել են: Եվս մեկ ուղևոր ծայրահեղ ծանր վիճակում տեղափոխվել է Յոհանեսբուրգի հիվանդանոց: Համաճարակաբանական իրավիճակը բարդանում է նաև օդային ուղիներով վարակի հնարավոր տարածմամբ. Իտալիայում հնարավոր վարակակիրների թիվը հասել է վեցի, ինչը կապված է Բուենոս Այրեսից և Յոհանեսբուրգից իրականացված չվերթների հետ:

Իտալիայի առողջապահության նախարարությունը տեղեկացրել է, որ Միլանում մեկուսացվել է Մեծ Բրիտանիայի մի քաղաքացի, ով համարվում է վարակակրի կոնտակտավոր անձ: Նա ճանապարհորդել է նույն օդանավով, որտեղ եղել է առաջին հիվանդի կինը: Ներկայումս կասկածելի ախտանիշներով անձանց կենսանմուշները հետազոտվում են Հռոմի Սպալանցանիի անվան ինստիտուտում: Մասնագետները ստուգում են ինչպես Արգենտինայից ժամանած զբոսաշրջիկների, այնպես էլ տեղի բնակիչների տվյալները, ովքեր ունեն թոքաբորբին բնորոշ գանգատներ:

Ռուսաստանի գիտությունների ակադեմիայի ակադեմիկոս, համաճարակաբան Գենադի Օնիշչենկոն պարզաբանել է, որ հանտավիրուսը պատկանում է ծանր ընթացք ունեցող վարակների շարքին և աչքի է ընկնում բարձր վարակելիությամբ: Ըստ մասնագետի՝ վարակի բնական օջախներ առկա են նաև ՌԴ տարածքում, իսկ հիմնական փոխանցողները կրծողներն են՝ մկներն ու համստերները: Փորձագետը հավաստիացրել է, որ մասնագետները քաջածանոթ են այս հարուցչին և իրականացնում են մշտական մոնիթորինգ՝ կանխելու դրա զանգվածային տարածումը: