Իրանի ԱԳՆ-ն մեկնաբանել է ԱՄՆ ռազմական ակտիվությունը
Իրանի բանակի զինծառայողները ուշադիր հետևում են ԱՄՆ Զինված ուժերի բոլոր տեղաշարժերին Մերձավոր Արևելքում և անհրաժեշտ միջոցներ են ձեռնարկում երկրի պաշտպանունակության ամրացման համար։ Այս մասին հայտնել է Իրանի Իսլամական Հանրապետության արտաքին գործերի նախարարության ներկայացուցիչ Էսմայիլ Բաղաին՝ մեկնաբանելով ԱՄՆ նախագահ Դոնալդ Թրամփի հայտարարությունները տարածաշրջան ամերիկյան բազմաթիվ նավեր ուղարկելու վերաբերյալ։
«Տարածաշրջան որևէ նավ ուղարկելը որևէ կերպ չի ազդի Իրանի՝ իր ինքնիշխանությունը պաշտպանելու վճռականության վրա։ Իրանի Իսլամական Հանրապետությունը ուշադիր հետևում է բոլոր տեղաշարժերին և միաժամանակ ոչ մի վայրկյան չի կորցնում պաշտպանունակության ամրացման, ազգային ինքնիշխանության և երկրի արժանապատվության պաշտպանության համար»,- նշել է Բաղաին ամենշաբաթյա մամուլի ասուլիսի ընթացքում։
Հունվարի 23-ին Դոնալդ Թրամփը հայտնել էր, որ ԱՄՆ-ը հետևում է Իրանին և տարածաշրջան է ուղարկում զգալի ուժեր։ Նրա խոսքով՝ այդ ուղղությամբ շարժվում են բազմաթիվ նավեր՝ կազմելով մեծ նավատորմ։ Ավելի վաղ ԱՄՆ նախագահը հայտարարել էր, որ լրջորեն դիտարկում է Իրանի Իսլամական Հանրապետության դեմ ուժի կիրառման հնարավորությունը։
