Իլոն Մասկը պատրաստվում է վերադառնալ քաղքականություն
Միլիարդատեր Իլոն Մասկը վերադառնում է քաղաքական ակտիվություն և պատրաստվում է ֆինանսավորել Հանրապետական կուսակցության քարոզարշավը 2026 թվականի ԱՄՆ միջանկյալ ընտրությունների ընթացքում։ Այս մասին հայտնում է The Wall Street Journal-ը։
Պարբերականի տվյալներով՝ Հանրապետական կուսակցության ազդեցիկ ներկայացուցիչները, այդ թվում՝ ԱՄՆ փոխնախագահ Ջեյ Դի Վենսը, դիմել են Մասկին՝ խնդրելով աջակցել կուսակցությանը Ներկայացուցիչների պալատում և Սենատում առկա աննշան մեծամասնությունը պահպանելու հարցում։
Թերթը նշում է, որ Մասկն արդեն 10 միլիոն դոլար է նվիրաբերել Սենատի հանրապետական թեկնածուին, իսկ նրա հարաբերությունները ԱՄՆ նախագահ Դոնալդ Թրամփի հետ սկսել են կարգավորվել։
ԱՄՆ Կոնգրեսի երկու պալատների միջանկյալ ընտրությունները նախատեսված են նոյեմբերի 3-ին։
The Wall Street Journal-ը հիշեցնում է, որ 2024 թվականին Իլոն Մասկը գրեթե 300 միլիոն դոլար է ծախսել Թրամփին և հանրապետականներին աջակցելու համար՝ դառնալով Միացյալ Նահանգների ամենախոշոր հանրային քաղաքական դոնորը։ Թերթի գնահատմամբ՝ ներկայիս մերձեցումը դիտվում է որպես պրագմատիկ համագործակցություն, որը Մասկին թույլ է տալիս պահպանել ազդեցությունը վարչակազմի վրա, իսկ Սպիտակ տանը՝ հասանելիություն նրա ռեսուրսներին և տեխնիկական ենթակառուցվածքներին։
