Մոպեդները, տրիցիկլները և քվադրիցիկլները կդառնան պարտադիր ապահովագրման ենթակա
ՀՀ կառավարությունը հունվարի 22-ի նիստում հավանություն է տվել «Ավտոտրանսպորտային միջոցների օգտագործումից բխող պատասխանատվության պարտադիր ապահովագրության մասին» օրենքում փոփոխություններ և լրացումներ կատարելու մասին օրենքի նախագծին։
Օրինագծի նպատակը որոշմամբ սահմանված չափանիշների հիման վրա գրանցվող ավտոտրանսպորտային միջոցների՝ Հայաստանի Հանրապետության տարածքում օգտագործումից բխող պատասխանատվության պարտադիր ապահովագրման պահանջի հստակեցումն է։
Նախագծով առաջարկվում է օրենքի 3-րդ հոդվածի 1-ին մասի 4-րդ կետում ավտոտրանսպորտային միջոցների շարքում ներառել նաև մոպեդները, տրիցիկլները և քվադրիցիկլները։
Արդյունքում կկարգավորվի մոպեդների, տրիցիկլների և քվադրիցիկլների պարտադիր ապահովագրման գործընթացը։
