Մայրերը ծննդաբերություններին եկել են ալկոհոլի ազդեցության տակ. մանրամասներ Նովոկուզնեցկի ծննդատան ողբերգական դեպքից

Կեմերովոյի մարզի նահանգապետը Նովոկուզնեցկի ծննդատանը նորածինների մահվան մեջ մեղադրել է մայրերին։

Իլյա Սերդյուկի խոսքով՝ նորածինները վաղաժամ են ծնվել, շատ մայրեր հիվանդանոց ընդունվելուց առաջ բժիշկների հսկողության տակ չեն եղել, իբր «չեն հոգացել իրենց առողջության մասին։ Նրանք նույնիսկ չարաշահել են ալկոհոլը՝ ծննդատուն ժամանելով ալկոհոլի ազդեցության տակ։ Նահանգապետը նաև պաշտպանել է ծննդատան աշխատակիցներին։

«Հանրությունն առաջինը մեղադրեց բժշկական անձնակազմին, բայց ես կպաշտպանեի նրանց: Եվ մեր տվյալների, մեր վերլուծության հիման վրա մենք հակված չենք հավատալ, որ հիվանդանոցում ներհիվանդանոցային վարակ է եղել», - նշել է նա։

Հիշեցնենք` ՌԴ Քննչական կոմիտեն Կեմերովոյի մարզում քրեական գործ է հարուցել անփութության և անզգուշությամբ մահ պատճառելու հոդվածներով՝ Նովոկուզնեցկ քաղաքում ծննդատանը նորածինների մահվան դեպքերի առթիվ։ Քննությունը սկսվել է այն բանից հետո, երբ Ամանորի օրերին բժշկական հաստատությունում մահացել է ինը նորածին։