ԱՄՆ-ում քննադատել են Թրամփի մաքատուրքերը
Սենատում դեմոկրատական փոքրամասնության առաջնորդ Չակ Շումերը հայտարարել է, որ իր կուսակցությունը կփորձի կանգնեցնել եվրոպական երկրների դեմ մաքսատուրքերի ներդրումը, որոնք ԱՄՆ նախագահը կապում է Գրենլանդիայի շուրջ ստեղծված իրավիճակի հետ։
Ըստ Շումերի՝ վարչակազմի սակագնային քաղաքականությունն արդեն իսկ հանգեցրել է գների աճի և վնաս հասցրել ամերիկյան տնտեսությանը։ Նա ընդգծել է, որ այս ուղղությամբ հետագա քայլերը միայն կվատթարացնեն վիճակը։
«Դոնալդ Թրամփի անխոհեմ մաքսատուրքերն արդեն հարվածել են ԱՄՆ տնտեսությանը։ Հիմա նա փորձում է խորացնել այդ վնասը՝ մաքսատուրքեր սահմանելով մեր մերձավոր դաշնակիցների դեմ՝ Գրենլանդիայի նկատմամբ վերահսկողություն հաստատելու իր փորձի համար»,- հայտարարել է սենատորը։
Շումերը տեղեկացրել է, որ Սենատի դեմոկրատները կներկայացնեն օրինագիծ, որն ուղղված է սակագների արգելափակմանը՝ նախքան դրանք լրացուցիչ վնաս կհասցնեն ԱՄՆ տնտեսությանը և եվրոպական գործընկերների հետ հարաբերություններին։
Ներկայումս Հանրապետական կուսակցությունը վերահսկում է Կոնգրեսի երկու պալատները. հանրապետականներն ունեն 53 տեղ Սենատի 100-ից և 218 տեղ Ներկայացուցիչների պալատի 435-ից։
Այդուհանդերձ, Թրամփի սակագնային ծրագրերից դժգոհություն են հայտնում նաև առանձին հանրապետականներ։ Ալյասկայի սենատոր Լիզա Մերկաուսկին առաջարկվող մաքսատուրքերն անվանել է անպետք և սխալ։
«Այս միջոցները կվանեն եվրոպական առանցքային դաշնակիցներին և չեն ամրապնդի ԱՄՆ ազգային անվտանգությունը»,- նշել է նա։
Հյուսիսային Կարոլինայի սենատոր Թոմ Թիլիսը հայտարարել է, որ նման քաղաքականությունը խարխլում է ՆԱՏՕ-ի միասնությունը և ձեռնտու է ԱՄՆ աշխարհաքաղաքական մրցակիցներին։
Ըստ նրա՝ մաքսատուրքերի սահմանումն այն դաշնակիցների դեմ, որոնք սահմանափակ թվով զինվորականներ են ուղարկել Գրենլանդիա՝ զորավարժությունների մասնակցելու համար, վնաս է հասցնում ԱՄՆ շահերին, ամերիկյան բիզնեսին և տրանսատլանտյան հարաբերություններին։
