Մարդուն կփոխպատվաստեն խոզի օրգաններ․ նոր նախագիծ Ռուսաստանում
Մինչև 2030 թվականը Ռուսաստանում կարող է ստեղծվել գենետիկորեն մոդիֆիկացված խոզ, որի օրգանները հարմար կլինեն մարդու փոխպատվաստման համար: Սա կլինի իր տեսակի մեջ առաջին նախագիծը երկրում և կօգնի լուծել դոնորական օրգանների կրիտիկական պակասի խնդիրը։ Այս մասին «ՏԱՍՍ»-ին ասել է Նովոսիբիրսկում գործող M-Genomics ընկերության գործադիր տնօրեն և նախագծի ղեկավար Էդուարդ Չույկոն:
«Նման կենդանու ստեղծումը կարող է տևել երեքից չորս տարի։ Մենք այս ոլորտում հետ ենք մնում համաշխարհային առաջատարներից, բայց անհրաժեշտ ֆինանսավորման դեպքում կարող ենք արդյունքների հասնել՝ գտնելով օպտիմալ լուծում», - ասել է գիտնականը։
Գենետիկորեն մոդիֆիկացված խոզերը նախատեսվում է բուծել ստերիլ պայմաններում՝ անասնաբուժական և բժշկական մշտական հսկողության ներքո, ապահովելով փոխպատվաստման համար օրգանների իդեալական որակը: Առաջին տարում նախագիծը կարող է ապահովել մոտ 200 երիկամ մարդկանց վիրահատությունների համար: Այս վիրաբուժական միջամտությունները նախատեսվում է ներառել պարտադիր բժշկական ապահովագրության ծրագրում:
Նշվում է, որ հետագա փուլերում ծրագիրը նախատեսվում է ընդլայնել՝ ընդգրկելով սրտի, ենթաստամոքսային գեղձի և լյարդի փոխպատվաստման ուղղությունները։
