Լիտվան պաշտոնապես դուրս է եկել հակահետևակային ականները արգելող կոնվենցիայից
Լիտվան պաշտոնապես դադարել է հանդիսանալ Օտտավայի կոնվենցիայի մասնակից՝ ՄԱԿ-ին համապատասխան ծանուցումից վեց ամիս անց։ Այս մասին հայտնում է LRT-ն՝ Լիտվայի ռադիոն և հեռուստատեսությունը։ Նշվում է, որ այսօր լրացել է այն ժամկետը, որը նախատեսված էր համաձայնագրից դուրս գալու համար Վիլնյուսի կողմից ՄԱԿ-ի գլխավոր քարտուղարին ներկայացված հայտարարությունից հետո։
Օտտավայի կոնվենցիան արգելում է հակահետևակային ականների օգտագործումը, կուտակումը, արտադրությունն ու փոխանցումը, ինչպես նաև պարտադրում է դրանց ոչնչացումը։ Լիտվայի իշխանությունները նախկինում հայտարարել էին, որ պատրաստվում են առաջիկա տարիներին սկսել հակահետևակային և հակատանկային ականների սեփական արտադրություն։ Ըստ հրապարակված տվյալների՝ նախատեսվում է առաջիկա տասնամյակում այդ նպատակով ծախսել մոտ 800 միլիոն եվրո։
Լիտվայից բացի, Օտտավայի կոնվենցիայից դուրս գալու որոշումները արդեն հաստատվել են նաև Էստոնիայի, Լատվիայի և Ֆինլանդիայի կողմից։ Լեհաստանի Սեյմը նույնպես ընդունել է համաձայնագրի դենոնսացման մասին օրենք, իսկ Ֆինլանդիայի նախագահը հաստատել է երկրի դուրս գալը։ Ավելի վաղ Ուկրաինայի իշխանությունները ևս հայտարարել էին կոնվենցիայից հրաժարվելու գործընթացի մեկնարկի մասին։
Օտտավայի կոնվենցիան ստորագրվել է 1997 թվականի դեկտեմբերի 3-ին և ուժի մեջ մտել 1999 թվականի մարտի 1-ին։ Մինչ այժմ դրան միացել էր 163 պետություն։
