Հայաստանը վերահաստատում է ԵԱՏՄ համագործակցության պատրաստակամությունը․ Փաշինյան
ՀՀ վարչապետ Նիկոլ Փաշինյանը Եվրասիական միջկառավարական խորհրդի հերթական նիստում հայտարարել է, որ Հայաստանը ևս մեկ անգամ վերահաստատում է իր պատրաստակամությունը շարունակելու փոխշահավետ համագործակցությունը ԵԱՏՄ-ի հետ։
«Հայաստանը մեծ նշանակություն է տալիս ԵԱՏՄ արտաքին տնտեսական կապերի աշխարհագրության ընդլայնմանը, որը առանցքային նշանակություն կունենա համաշխարհային տնտեսության մեջ միության դերի ապագա ամրապնդմանը։ Ազատ տնտեսական համագործակցության պայմանագրերի կնքումը ոչ միայն ակտիվացնում է երկխոսությունը, այլև բարձրացնում մրցունակությունը` բացելով նոր հնարավորություններ մեր երկրների տնտեսության աճի համար»,- ասել է վարչապետը։
Փաշինյանի ընդգծմամբ՝ տրանսպորտային ենթակառուցվածքների ոլորտը կարևոր ուղղություններից է։ Այս առումով նա նշել է, որ տարածաշրջանային ենթակառուցվածքների ապաշրջափակումը կարող է բացել նոր հնարավորություններ տնտեսական համագործակցության զարգացման համար։
