Զախարովան Օվերչուկի Հայաստան այցից մանրամասներ է ներկայացերել
Ռուսաստանի փոխվարչապետ Ալեքսեյ Օվերչուկի երևանյան հանդիպումների արդյունքում ձևավորվել է Եվրոպական և Եվրասիական միությունների տեխնիկական կարգավորման անհամատեղելիության մասին որոշ նրբությունների ըմբռնում: Այս մասին ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
Նրա խոսքով՝ Օվերչուկի հանդիպումներն անցել են պրոֆեսիոնալ, անկեղծ և կառուցողական մթնոլորտում, շոշափվել են տնտեսական համագործակցության բազմաթիվ ասպեկտներ ինչպես երկկողմ, այնպես էլ ԵԱՏՄ ձևաչափով: Քննարկվել են որոշակի ապրանքատեսակների, մասնավորապես սննդի մատակարարման հարցերը, հաջողվել է հասնել որոշ նրբերանգների ընկալմանը։
«Այդ երկխոսությունը ցույց է տվել, որ Հայաստանը շահագրգռված է եվրասիական ինտեգրման մեխանիզմների ռիթմիկ գործարկմամբ։ Հայաստանյան արտադրողները զգում են Եվրասիական միությանը իրենց երկրի մասնակցության գործնական արդյունքը, հասկանում են դեպի ԵԱՏՄ երկրներ, այդ թվում՝ Ռուսաստան ապրանքների անարգել արտահանման նշանակությունը», - հավելել է Զախարովան։
