Դա երկու լուր է պարունակում` լավ և վատ. Զուրաբյանը` հայ-ամերիկյան հուշագրերի վերաբերյալ
Այսօր, օգոստոսի 8-ին հայ-ամերիկյան հուշագրերի ստորագրումից երեք շաբաթ հետո Հայաստանի թափանցիկ կառավարությունը վերջապես, մեր պահանջների ճնշման ներքո, դրանք հրապարակեց, փարատելով այն մտահոգությունը, որ դրանցում թաքնված են «Զանգեզուրյան միջանցքի» կարգավորման այնպիսի դրույթներ, որոնք դեմ են գնում մեր ինքնիշխանությանն ու տարածքային ամբողջականությանը: Այս մասին Ֆեսյբուքի իր էջում գրել է ՀԱԿ փոխնախագահ Լևոն Զուրաբյանը:
«Հարցեր այնուամենայնիվ մնում են.
1. Ինչու՞ է ԱՄՆ Նախագահ Դոնալդ Թրամփ հենց ստորագրման արարողության ժամանակ պնդել, որ Հայաստանը համաձայնվել է 99 տարով տրամադրել Ադրբեջանը Նախիջևանին կապող տրանզիտային միջանցք: Նույն պնդում է նաև հեղինակավոր արևմտյան մամուլը:
2. Արդյո՞ք այս պնդումները հիմնված են գաղտնի պահվող լրացուցիչ գրավոր թե՞ ինչ-որ նախնական բանավոր պայմանավորվածությունների վրա:
3. Ինչու՞ այդ փասթաթղթերը չէին հրապարակվել հենց ստորագրման օրը:
Եթե հրապարակված փաստաթղթերը սպառում են ձեռք բերված պայմանավորվածությունների ծավալը, դա իր մեջ երկու լուր է պարունակում, լավ և վատ:
Լավը, ասված «եթե»-ի դեպքում, ի հարկե, այն է, որ վաշինգտոնյան հուշագրերով մեր ինքնիշխանությանն ու տարածքային ամբողջականությանը որևէ անշրջելի հարված դեռ հասցված չէ:
Վատը, հատկապես Փաշինյանի կառավարության համար, այն է, որ ստորագրված փաստաթղթերը արժանի չէին այն թմբկահարմանը, որին նրանք արժանացան Հայաստանի կողմից:
Պարզվում է, որ իրավական ուժ չունեցող և պարտավորություններ չառաջացնող այս փաստաթղթերի փաթեթի միակ նպատակն էր ընդամենը ընտրություններից առաջ Փաշինյանին` խաղաղության իբր հաստատման մասին խաբուսիկ մի փաստաթուղթ տրամադրելն էր»,- գրել է Լևոն Զուրաբյանը:
