Պուտինը՝ հայ-ադրբեջանական հարաբերություններում կարևոր քայլերի մասին
Ռուսաստանի նախագահ Վլադիմիր Պուտինը Հայաստանի վարչապետ Նիկոլ Փաշինյանի հետ հեռախոսազրույցի ժամանակ խոսել է ԱՄՆ նախագահի հատուկ բանագնաց Սթիվեն Ուիթքոֆֆի հետ իր զրույցի արդյունքների և Ալյասկայում ԱՄՆ առաջնորդ Դոնալդ Թրամփի հետ հանդիպման նախապատրաստման մասին։ Այս մասին հաղորդում են Կրեմլից։
Նշվում է, որ ՀՀ վարչապետը ողջունել է ուկրաինական ճգնաժամի խաղաղ կարգավորմանն ուղղված քայլերը։
Ռուսաստանի նախագահը նաև նշել է այն քայլերի կարևորությունը, որոնք նպաստում են Երևանի և Բաքվի միջև կայուն խաղաղության ապահովմանը, և հայտնել է Մոսկվայի պատրաստակամությունը նպաստել այս գործընթացին։
«Հաստատվել է ռուսական կողմի պատրաստակամությունը՝ 2020-2022 թվականների ամենաբարձր մակարդակի հայտնի եռակողմ համաձայնագրերին համապատասխան՝ նպաստելու հայ-ադրբեջանական հարաբերությունների համապարփակ կարգավորմանը, այդ թվում՝ տարածաշրջանում տրանսպորտային հաղորդակցությունների ապաշրջափակմանը»,- ասվում է հայտարարության մեջ։
