Լուկաշենկոն՝ Թրամփ-Պուտին-Զելենսկի եռակողմ հանդիպում կազմակերպելու մասին

Բելառուսի նախագահ Ալեքսանդր Լուկաշենկոն ամերիկյան Time ամսագրին տված հարցազրույցի ընթացքում հաստատել է ՌԴ նախագահ Վլադիմիր Պուտինի, ԱՄՆ նախագահ Դոնալդ Թրամփի և Ուկրաինայի նախագահ Վլադիմիր Զելենսկու եռակողմ բանակցությունները կազմակերպելու պատրաստակամությունը։

Լուկաշենկոն կարծում է, որ նման բանակցություններին անհրաժեշտ է մանրակրկիտ նախապատրաստվել։ Նա նաև կարծիք է հայտնել, որ նման բանակցությունները կարելի է անցկացնել Մինսկում։

Նրա խոսքերով՝ Պուտինը ուրախ կլիներ հանդիպել Թրամփին Բելառուսի մայրաքաղաքում։ Թրամփն էլ գոհ կլիներ այդ հանդիպմամբ։

«Ճիշտ է, պետք է նախապես պատրաստվել: Կցանկանա՞ք՝ ես կստանձնեմ դա։ Հանուն խաղաղության։ Եկեք սկսենք նախապատրաստվել, բայց կտեսնեք՝ ինչպես կվարվի Զելենսկին։ Նա կդիմադրի՝ «Ես կտրականապես դե՛մ եմ»», - ասել է Լուկաշենկոն։