Խոշոր հրդեհ՝ Թուրքիայում․ Դարդանելի նեղուցում նավագնացությունը դադարեցվել է

Թուրքիայի Դարդանելի նեղուցում նավագնացությունը դադարեցվել է երկու ուղղություններով՝ անտառային հրդեհների պատճառով։ Այս մասին  հայտնել է Թուրքիայի տրանսպորտի նախարարության ծովային գործերի վարչությունը, գրում է «ՏԱՍՍ»-ը։

«Դարդանելի նեղուցում նավագնացությունը ժամանակավորապես դադարեցվել է երկու ուղղություններով՝ Չանաքքալե նահանգում տեղի ունեցած անտառային հրդեհների պատճառով», - ասվում է հայտարարության մեջ։

Գործակալության տվյալներով՝ հրդեհներից մեկը բռնկվել է Սարըջայելի բնակավայրի տարածքում։ Ուժեղ քամու ազդեցության տակ կրակը արագ տարածվել է մեծ տարածքի վրա, այդ թվում՝ գյուղատնտեսական հողերի վրա, և մոտեցել է հենց բնակավայրին։ Հրդեհը մարվում է, առաջացած ծուխը տարածվել է դեպի նեղուց։

Դարդանելի նեղուցը կապում է Եգեյան ծովը Մարմարա ծովի և Բոսֆորի միջոցով՝ Սև ծովի հետ։