Իսրայելը զորքեր է կուտակում Գազայում․ ռազմական գործողություններ կսկսվեն․ NBC

Իսրայելի պաշտպանության ուժերը (IDF) զորքեր և ռազմական տեխնիկա են կուտակում Գազայի հատվածի հետ սահմանի մոտ՝ անկլավում ռազմական գործողությունը ընդլայնելու հնարավոր ծրագրերի իրականացման համար: Այս մասին հաղորդում է NBC News հեռուստաալիքը՝ հղում անելով իր աղբյուրներին:

Անանուն ամերիկացի պաշտոնյաների խոսքով՝ արբանյակային լուսանկարները ցույց են տալիս ռազմական տեղաշարժեր և կուտակումներ պաղեստինյան անկլավի հետ սահմանի մոտ, ինչը վկայում է, որ իսրայելական ուժերը պատրաստվում են խոշոր ցամաքային գործողության: Աղբյուրները նշել են, որ Իսրայելի ծրագրերը կարող են ներառել պաղեստինյան արմատական շարժման՝ Համասի կողմից պատանդների ազատ արձակումը և մարդասիրական օգնության հասանելիության ապահովումը մարտերից չտուժած տարածքներ:

Ավելի վաղ Իսրայելի վարչապետ Բենիամին Նեթանյահուի գրասենյակի հայտարարություն էր տարածել, որ Իսրայելի ռազմաքաղաքական կաբինետը հաստատել է վարչապետի առաջարկած ծրագիրը՝ Գազա քաղաքի ամբողջ տարածքը վերահսկողության տակ վերցնելու և պաղեստինյան անկլավում գործողությունը ընդլայնելու վերաբերյալ: