Թրամփը՝ Կամչատկայի հզոր երկրաշարժից հետո զգուշացրել է ցունամիի սպառնալիքի մասին

Հավայան կղզիների բնակիչներին զգուշացրել են ցունամիի մասին՝ կապված Խաղաղ օվկիանոսում տեղի ունեցած հզոր երկրաշարժի հետ։ Այս մասին հայտարարել է ԱՄՆ նախագահ Դոնալդ Թրամփը։

Թրամփը նշել է, որ ցունամիի մասին նախազգուշացումը շարունակում է ուժի մեջ մնալ նաև Ալյասկայի և ԱՄՆ-ի Խաղաղօվկիանոսյան ափերի համար, միաժամանակ ընդգծելով, որ Ճապոնիան նույնպես սպառնալիքի տակ է։

ԱՄՆ ցունամիների նախազգուշացման կենտրոնը հայտարարել է, որ Խաղաղ օվկիանոսում ուժեղ երկրաշարժը կարող է ցունամիի ալիքներ առաջացնել, որոնց բարձրությունը կգերազանցի 3 մետրը և կհասնի մինչև Հարավային Ամերիկա, այդ թվում՝ Էկվադորի և Չիլիի ափերը։ Նշվում է, որ Ճապոնիայի և Հավայան կղզիների իշխանությունները հայտարարել են ափամերձ շրջաններից բնակչության շտապ տարհանման մասին դեպի ավելի բարձր վայրեր։  Հաղորդվում է նաև, որ Կամչատկայի երկրամասի ափերի մոտ տեղի ունեցած հզոր երկրաշարժից հետո ցունամիի առաջին ալիքները հասել են ԱՄՆ Կալիֆոռնիա նահանգի ափ:

Հիշեցնենք՝ ավելի վաղ հայտնել էինք, որ Ռուսաստանի՝ Կամչատկայի ափերի մոտ, տեղի է ունեցել 8.7 մագնիտուդով հզոր երկրաշարժ։ Կամչատկայում և Կուրիլյան կղզիներում երկրաշարժից հետո ալիքների բարձրությունը հասել է 5-6 մետրի։ Նշվում է, որ ցունամին բավականին ուժեղ է եղել։