Ջո Բայդենի մոտ քաղցկեղի ագրեսիվ տեսակ է ախտորոշվել. Թրամփի արձագանքը
ԱՄՆ նախկին նախագահ Ջո Բայդենի մոտ ախտորոշվել է շագանակագեղձի քաղցկեղ: Այս մասին հայտնում է NBC News-ը՝ հղում անելով Բայդենի գրասենյակին։
«Անցյալ շաբաթ նախագահ Ջո Բայդենը հետազոտվել է շագանակագեղձում հանգույցի հայտնաբերման կապակցությամբ այն բանից հետո, երբ զգացել է միզարձակման աճող ախտանշաններ: Ուրբաթ օրը նրա մոտ ախտորոշվել է շագանակագեղձի քաղցկեղ, որը բնութագրվում է Գլիսոնի սանդղակով 9 միավորով (5-րդ խումբ)՝ ոսկրային մետաստազներով»,-ասվում է նախագահի անձնական գրասենյակի հրապարակած հայտարարության մեջ։
Հայտարարության մեջ նաև նշվում է. «Թեև սա հիվանդության ավելի ագրեսիվ ձև է, քաղցկեղը, ըստ երևույթին, զգայուն է հորմոնների նկատմամբ, ինչը թույլ է տալիս արդյունավետ բուժել այն: Նախագահը և նրա ընտանիքն իրենց բժիշկների հետ միասին քննարկում են բուժման տարբերակները»։
Հավելենք, որ ԱՄՆ նախագահ Դոնալդ Թրամփն անդրադարձել է լուրին և գրառում կատարել` նշելով, որ տխրությամբ է ընդունել Ջո Բայդենի հիվանդության մասին լուրը։
Թրամփը իր և կնոջ անունից աջակցություն է հայտնել Բայդենների ընտանիքին և հույս հայտնել, որ Ջո Բայդենի բուժումը հաջող կընթանա։
