Հրապարակվել են Հայաստանում զբոսաշրջության ամենահայտնի ուղղությունները

Ազգային վիճակագրական կոմիտեն հրապարակել է 2024 թվականին զբոսաշրջային օպերատորների կամ գործակալությունների կողմից կազմակերպված շրջագայությունների շրջանակում Հայաստանի ամենատարածված ուղղությունները։

«Փաստինֆո»-ի հաղորդմամբ՝ ըստ պաշտոնական տվյալների՝ ամենաշատ այցելություններն իրականացվել են Գառնի–Գեղարդ ուղղությամբ. այստեղ այցելել է 34,667 զբոսաշրջիկ։

Երկրորդ տեղում է մայրաքաղաքը․ 20,159 զբոսաշրջիկ նախընտրել է շրջել Երևանում։

Երրորդը Սևանն ու Դիլիջանն են․ ավելի քան 19,000 զբոսաշրջիկ հետաքրքրվել է այս ուղղություններով։

Հայտնի տուրիստական ուղղությունների թվում են նաև Տաթևը, Խոր Վիրապը, Էջմիածին–Զվարթնոցը, Ծաղկաձորը, Գյումրին և Արենին։

Ի տարբերություն այս տարածված ուղղությունների՝ Ջերմուկը գրանցել է միայն 4,327 այցելու, ինչը այն դարձրել է զբոսաշրջիկների կողմից ամենաքիչ այցելված վայրերից մեկը։ Ավելի քիչ այցելություններ են գրանցվել միայն Օշականում և Խնձորեսկում։