Շենգավիթ վարչական շրջանը՝ պատշգամբի փլուզման և կնոջ ցած ընկելու դեպքի մասին
Այսօր Շենգավիթ վարչական շրջանի Արարատյան փողոցի համար 66 շենքում պատշգամբը փլուզվել ու քաղաքացին ընկել է ցած, որի հետևանքով ստացել է վնասվածքներ և տեղափոխվել «Էրեբունի» բժշկական կենտրոն: Այս մասին ասվում է «Շենգավիթ վարչական շրջան»-ի տարածած հայտարարության մեջ:
Հաշվի առնելով ստեղծված իրավիճակը և հետագայում նմանատիպ դժբախտ պատահարներից խուսափելու նպատակով՝ Շենգավիթ վարչական շրջանը քաղաքացիներին կրկին անգամ իրազեկում է՝ բազմաբնակարան շենքերի պատշգամբները հանդիսանում են բնակարանի սեփականատիրոջ սեփականությունը և դրա պահպանման, վերանորոգման աշխատանքները պետք է իրականացնի բնակարանի սեփականատերը։
«Միաժամանակ հայտնում ենք, որ վարչական շրջանի կողմից, որպես բարի կամքի դրսևորում, յուրաքանչյուր տարվա ծրագրերով իրականացվում են վթարային պատշգամբների վերանորոգման և ամրացման աշխատանքներ՝ սահմանափակ քանակությամբ»,- ասվում է հաղորդագրությունում։
Ավելի վաղ Shamshyan.com-ը հայտնել էր, որ Երևանում ժամը 13:20-ի սահմաններում Շենգավիթի վարչական շրջանի Արարատյան 66 շենքի 2-րդ հարկի բնակիչը պատշգամբում լվացք փռելիս է եղել, երբ պատշգամբը փլուզվել ու ընկել է ցած. նա տեղափոխվել է հիվանդանոց:
