Հութիները հարվածել են Թել Ավիվի օդանավակայանին

Եմենի «Անսար Ալլահ» շարժումը հայտարարել է Պաղեստին-2 հիպերձայնային բալիստիկ հրթիռի կիրառմամբ ռազմական գործողության հաջող անցկացման մասին։ Մարտագլխիկը հարվածել է Բեն Գուրիոն օդանավակայանին՝ Իսրայելի ամենամեծ օդային հանգույցին: Այս մասին հայտնել է հութիների բրիգադային գեներալ Յահյա Սարիան։

«Մենք կշարունակենք խոչընդոտել իսրայելական նավագնացությանը և աջակցել Գազայում գտնվող մեր եղբայրներին, քանի դեռ ագրեսիան չի ավարտվել և պաղեստինցի ժողովրդի պաշարումը չի չեղարկվել», - ասել է Սարիան։

Գեներալը նաև հաղորդել է Կարմիր ծովում ԱՄՆ ռազմածովային ուժերի նավատորմի խմբին հերթական հարվածի մասին, այդ թվում՝ հարձակման է ենթարկվել նաև USS Harry S. Truman միավորման ֆլագմանը։

Ավելի վաղ հութիներին հաջողվել էր Եմենի երկնքում ոչնչացնել ամերիկյան MQ-9 հետախուզական անօդաչու թռչող սարք։ Հիշեցնենք, որ տարածաշրջանում հակամարտությունը սրվեց ԱՄՆ ռազմական գործողության մեկնարկից հետո։