Թրամփը մեզ տալիս է անհրաժեշտ գործիքներ Իրանի դեմ պայքարելու համար․ Նեթանյահու

ԱՄՆ նախագահ Դոնալդ Թրամփն ամեն օր ցույց է տալիս, որ Իսրայելի՝ երբևէ Սպիտակ տանը եղած ամենամեծ բարեկամն է: Այս մասին ասել է Իսրայելի վարչապետ Բենիամին Նեթանյահուն:

«Ցանկանում եմ շնորհակալություն հայտնել նախագահ Թրամփին Իսրայելին ցուցաբերած անսասան աջակցության համար։ Վաշինգտոն կատարած իմ վերջին այցի ժամանակ ես ասացի, որ Դոնալդ Թրամփն ամենամեծ ընկերն է, որ Իսրայելը երբևէ ունեցել է Սպիտակ տանը։ Թրամփը ամեն օր ցույց է տալիս այդ բարեկամությունը։ Նա իր բարեկամությունը ցույց է տվել մեզ՝ ուղարկելով այն ամբողջ սպառազինությունը, որի ուղարկումը դադարեցվել էր Բայդենի օրոք»,- նշել է Նեթանյահուն:

Ըստ Իսրայելի վարչապետի՝ Թրամփն իրենց տալիս է այն գործիքները, որոնք անհրաժեշտ են Իրանի ահաբեկչական առանցքի դեմ աշխատանքն ավարտելու համար:

«Թրամփն իր բարեկամ լինելը ցույց է տվել՝ լիովին աջակցելով Իսրայելին և ճնշում գործադրելով ՀԱՄԱՍ-ի մոտ պահվող պատանդներին ազատ արձակելու համար: Իսրայելն ընդունել է նախագահ Թրամփի բանագնաց Սթիվ Ուիթքոֆի ծրագիրը՝ ժամանակավոր հրադադարը 50 օրով երկարաձգելու վերաբերյալ։ Այդ ընթացքում մենք կարող ենք քննարկել մշտական ​​հրադադարի պայմանները, որոնք կդադարեցնեն պատերազմը Գազայում: Իսրայելն այս ծրագիրն ընդունել է, սակայն ՀԱՄԱՍ-ը մերժել է»,-  ասել է նա: