Ինչ պետք է անի Ուկրաինան, որ ԱՄՆ–ն վերսկսի զենքի մատակարարումները. Վենս
ԱՄՆ-ն չի բացառում Ուկրաինային զենքի և ռազմական տեխնիկայի մատակարարումների վերականգնման հնարավորությունը, եթե Կիևը սկսի խաղաղ բանակցությունները։ Այս մասին ԱՄՆ Կոնգրեսում լրագրողների հետ զրույցում հաստատել է ԱՄՆ փոխնախագահ Ջ.Դ.Վենսը։
Նրան խնդրել են պարզաբանել, թե որքան կտևի Կիևին ռազմական օգնություն տրամադրելու դադարը, որի մասին նախօրեին հայտարարել էր ԱՄՆ վարչակազմը։ «(Միացյալ Նահանգների նախագահ Դոնալդ Թրամփը) հասկացրել է, որ ցանկանում է, որ ուկրաինացիները նստեն բանակցությունների սեղանի շուրջ: Կարծում եմ, երբ ուկրաինացիները նստեն բանակցությունների սեղանի շուրջ, ամեն ինչ սեղանի վրա կլինի»,- պատասխանել է Վանսը։
Փետրվարի 28-ին Վլադիմիր Զելենսկին ժամանել է Սպիտակ տուն՝ հանդիպելու Թրամփին։ Լրագրողների ներկայությամբ զրույցի ընթացքում նրանց միջև վիճաբանություն է ծագել, որի ժամանակ Թրամփը Զելենսկիին մատնանշել է իր անհարգալից վերաբերմունքը ԱՄՆ-ի նկատմամբ, իսկ Վենսը նշել է, որ մոռացել է շնորհակալություն հայտնել Վաշինգտոնին Կիևին ցուցաբերած աջակցության համար։ Հանդիպմանը հաջորդած մամուլի ասուլիսը չեղարկվել է, իսկ ԱՄՆ-ի և Ուկրաինայի միջև հանքային ռեսուրսների մասին համաձայնագրի ստորագրումը չի կայացել։ Թրամփը «Truth Social» սոցիալական ցանցում հայտարարություն է հրապարակել, որում ընդգծել է, որ Զելենսկին անհարգալից վերաբերմունք է դրսևորել և ուկրաինական հակամարտությունը խաղաղ ճանապարհով լուծելու պատրաստակամություն չի հայտնել։
