Զելենսկին Թրամփին Ուսիկի «կեղծ» գոտին է նվիրել
Ուկրաինայի նախագահ Վլադիմիր Զելենսկին իր ամերիկացի գործընկեր Դոնալդ Թրամփին նվիրել է ուկրաինացի ծանր քաշային բռնցքամարտիկ Ալեքսանդր Ուսիկի «կեղծ» գոտին։ Այս մասին հայտարարել է ինքը՝ մարզիկը, փոխանցում է ուկրաինական «Обозревател» հրատարակությունը։
«Բոլոր գոտիներս տանն են։ Ի՞նչ գոտի է տվել Զելենսկին Թրամփին, ինչ-որ հատուկ գոտի, կարծում եմ: Ես գիտեմ, թե ինչ գոտի է, ուղղակի ոչ մեկին չեմ կարող ասել, և չեմ ուզում», - ասել է նա:
Զելենսկին փետրվարի 28-ին այցելել էր Վաշինգտոն, որտեղ նախատեսված էր հանդիպում Թրամփի հետ։ Բանակցությունների ժամանակ Զելենսկու կողքին կար WBC չեմպիոնական գոտի՝ Ուսիկի անունով։
Փետրվարի 28-ի ամերիկա-ուկրաինական բանակցություններն այդպես էլ չեն կայացել։ Բանակցության ժամանակ վիճաբանություն է սկսվել Զելենսկու, Թրամփի և փոխնախագահ Վենսի միջև։ Թրամփն ու Վենսը հայտարարել են, որ ուկրաինական կողմը անշնորհակալ է տրամադրված օգնության համար։ Եվրոպացի առաջնորդները Զելենսկու կողմն են անցել, մինչդեռ ՆԱՏՕ-ի գլխավոր քարտուղար Մարկ Ռյուտեն Ուկրաինայի նախագահին կոչ է արել վերականգնել հարաբերությունները Թրամփի հետ։
