Փաշինյանի կտրուկ որոշումը. Հայաստանը դուրս է մղվում ԵԱՏՄ-ից

ՀՀ Կառավարությունն այսօր հավանություն տվեց «Եվրոպական Միությանը Հայաստանի Հանրապետության անդամակցելու գործընթացի մեկնարկի մասին» օրինագծին։

«ՀՀ-ն ԵՄ անդամ կարող է դառնալ միայն այն դեպքում, երբ կնշանակվի հանրաքվե, և մեր Սահմանադրությամբ նախատեսված կարգով հանրաքվեի մասնակիցների՝ օրենքով սահմանված չափով կողմ ձայներ կստացվեն»,- հայտարարեց վարչապետ Փաշինյանը:

Տարածաշրջանում ստեղծված իրավիճակում ՀՀ իշխանությունների այս որոշումը կարելի է որակել թերևս մեկ բառով` կտրուկ: Հայաստանը լինելով ԵԱՏՄ տնտեսական բլոկի անդամ, սկսում է մեկ այլ խոշոր տնտեսական միությանը անդամակցելու գործընթաց:

Թե ինչ արձագանքի կարժանանա ՀՀ իշխանությունների այս որոշումը ԵԱՏՄ-ում և, մասնավորապես, Ռուսատանում, դժվար չէ ենթադրել: Չի կարելի բացառել, որ Հայաստանի կտրուկ քայլից հետո հենց Ռուսաստանը դե ֆակտո, կամ դե յուրե Հայաստանին դուրս մղի ԵԱՏՄ-ից, ինչը կհանգեցնի տնտեսական կոլապսի: Ահնյատ է թերևս այն, որ ֆորմալ մակարդակով հայացքն ուղղելով դեպի Եվրամիություն Հայաստանը կամա թե ակամա դուրս է մղվում ԵԱՏՄ-ից: Պարզից էլ պարզ է, որ նույն Եվրամիությունը չի կարող գործընթաց սկսել մեծ հաշվով կահառակորդ տնտեսական բլոկի ներկայացուցչի հետ:

2024 թվականին Հայաստանը նախագահում էր ԵԱՏՄ-ում, սակայն Փաշինյանի խնդրանքով կառույցի գագաթնաժողովը Երևանից տեղափոխվեց Սանկտ Պետերբուրգ: Այդ գագաթնաժողովին, սակայն, ՀՀ վարչապետը կորոնավիրուսի դրական թեսթի պատճառով ներկա չգտնվեց, այն վարելով հեռավար եղանակով: Արդեն 2025 թվականի կառավարության առաջին նիստում Փաշինյանի կառավարությունն ընդունեց ըստ էության դարակազմիկ որոշումը: Որոշում, որի ակունքներին ու դրդապատճառներին կանդրադառնանք ավելի ուշ: Այս պահին մնում է թերևս հուսալ, որ ՀՀ կառավարության այս քայլը հաշվարկված է և չի հանգեցնի թե տնտեսական և թե քաղաքական ցնցումների: