Նարենդրա Մոդին Կիևում հանդիպել է Զելենսկու հետ
Հնդկաստանի վարչապետ Նարենդրա Մոդին ժամանել է Կիև, նա կհանդիպի Վլադիմիր Զելենսկու հետ, հայտնում է NDTV-ն։ Սա նրա առաջին այցն է Ուկրաինա։
Կիև Մոդին ժամանել է Լեհաստան երկօրյա ուղևորությունից անմիջապես հետո։
«Ես անհամբեր սպասում եմ նախագահ Զելենսկու հետ նախորդ զրույցները շարունակելու հնարավորությանը երկկողմ համագործակցության ամրապնդման վերաբերյալ և կարծիքներ փոխանակելու Ուկրաինայում շարունակվող հակամարտության խաղաղ կարգավորման վերաբերյալ: Ես վստահ եմ, որ այս այցը կծառայի որպես երկու երկրների հետ լայնածավալ շփումների բնական շարունակություն եւ կօգնի հիմք ստեղծել առաջիկա տարիներին ավելի ամուր եւ դինամիկ հարաբերությունների համար», — NDTV-ն մեջբերում է Հնդկաստանի վարչապետի հայտարարությունը։
Ուկրաինայում օգոստոսի 23- ին նշվում է պետական դրոշի օրը, իսկ օգոստոսի 24-ին՝ անկախության օրը:
Bloomberg-ի տվյալներով՝ Հնդկաստանի վարչապետը համաձայնել է ուղերձներ փոխանցել Զելենսկու և Ռուսաստանի նախագահ Վլադիմիր Պուտինի միջև։ Ընդ որում, Հնդկաստանը չի ցանկանում միջնորդ լինել դիվանագիտական կարգավորման հարցում, գործակալությունը նման դիրքորոշումը բացատրել է ռուսական էժան էներգառեսուրսներից եւ զենքից Նյու Դելիի կախվածությամբ: APF-ն նշել է, որ Մոդին «նուրբ հավասարակշռություն» է պահպանում Մոսկվայի հետ ջերմ կապերի պահպանման եւ արեւմտյան երկրների հետ անվտանգության ոլորտում ավելի սերտ գործընկերային հարաբերությունների հաստատման համար:
Հուլիսի սկզբին Մոդին ժամանել էր Ռուսաստան և հանդիպել Պուտինի հետ։ Մեկնաբանելով ռազմական գործողությունները՝ նա Ռուսաստանի նախագահի հետ հանդիպման ժամանակ ասել է, որ «պատերազմը լուծում չէ», իսկ «ռումբերը, հրթիռները, հրացանները չեն կարող խաղաղություն ապահովել»: Պուտինն ի պատասխան շնորհակալություն է հայտնել նրան, դրանով ավարտվել է հանդիպման բաց հատվածը։
Զելենսկին այն ժամանակ դատապարտեց Մոդիի այցը Պուտինին։ Զելենսկու քննադատությունից հետո Ուկրաինայի դեսպան Ալեքսանդր Պոլիշչուկին կանչել են Հնդկաստանի ԱԳՆ։
