Վենեսուելայի Գերագույն դատարանը Մադուրոյին ճանաչել է որպես ընտրված նախագահ մինչև 2031 թվականը

Գերագույն դատարանը Նիկոլաս Մադուրոյին ճանաչել է որպես Վենեսուելայի ընտրված նախագահ 2025-2031 թվականների համար։ Այս մասին հայտնում է Telesur հեռուստաալիքը՝ հղում անելով դատարանի որոշմանը։

Հուլիսի 28-ին Վենեսուելայում նախագահական ընտրություններ էին անցկացվել։ Ինչպես հայտարարել էր երկրի Ազգային ընտրական խորհուրդը՝ քվեաթերթիկների գրեթե 97%-ը հաշվելուց հետո, Մադուրոյի օգտին քվեարկել էր ընտրողների 51,95%-ը, իսկ նրա հիմնական մրցակից Էդմունդո Գոնսալեսի օգտին՝ 43,18%-ը։ Ընդդիմության առաջնորդներից մեկը՝ Մարիա Կորինա Մաչադոն, արդեն ընտրությունների օրը հայտարարել էր, որ Գոնսալեսի թիմը չի ճանաչի ընտրություններում իր պարտությունը։

Հաջորդ օրը Կարակասի կենտրոնում բողոքի ցույցեր ու անկարգություններ սկսվեցին։ Վենեսուելայի իշխանությունների տվյալներով, հրկիզման և այլ իրավախախտումների համար ձերբակալվել է անկարգություններին մասնակից ավելի քան 1000 մարդ, վիրավորվել է ավելի քան 70 իրավապահ, իսկ երկու զինվորական սպանվել է։