Իսրայելի պատվիրակությունը մեկնում է Կահիրե՝ Գազայի հարցով բանակցությունների
Իսրայելցի բանակցողները Մոսադի տնօրեն Դեյվիդ Բարնեայի գլխավորությամբ մեկնել են Եգիպտոսի մայրաքաղաք՝ շարունակելու Գազայի հատվածում զինադադարի շուրջ բանակցությունները։ Այս մասին հինգշաբթի հայտնել է The Times of Israel-ը՝ հղում անելով իր աղբյուրին։
Պարբերականը չի հստակեցնում, թե արդյոք մյուս պատվիրակություններն էլ են գտնվում Կահիրեում։ Սակայն, ըստ CNN-ի, ԱՄՆ-ը, հանդես գալով որպես միջնորդ, համաձայնել է իր բանակցողներին Եգիպտոս ուղարկել։ Ամերիկյան պատվիրակությունը, պարբերականի տվյալներով, կրկին կգլխավորի ԿՀՎ ղեկավար Ուիլյամ Բերնսը։
Միևնույն ժամանակ, The National-ն ավելի վաղ, վկայակոչելով աղբյուրներ, հայտնել էր, որ զինադադարի բանակցությունների փուլը, որը պետք է սկսվեր հինգշաբթի օրը Կահիրեում, հետաձգվել է հաջորդ շաբաթ, որպեսզի կողմերը ժամանակ ունենան քննարկելու նոր առաջարկները։
Գազայի հարցով մի քանի ամիս շարունակվող բանակցային գործընթացում ներգրավված են հակամարտող կողմերը՝ Իսրայելը և պաղեստինյան ՀԱՄԱՍ շարժումը, ինչպես նաև միջնորդները՝ Եգիպտոսը, Կատարը և ԱՄՆ-ը։
