Պուտինը Փեզեշքիանին հրավիրել է մասնակցելու «BRICS» գագաթնաժողովին
Մոսկվայում Իրանի դեսպան Կազեմ Ջալալին հայտարարել է Մասուդ Փեզեշքիանին Վլադիմիր Պուտինի պաշտոնական հրավերի մասին՝ մասնակցելու «BRICS» գագաթաժողովին: Այս մասին տեղեկացրել է Mehr-ը։
ՌԴ-ում Իրանի դեսպանը հայտնել է, որ հավանական է, որ Իրանը եւ Ռուսաստանը կստորագրեն համագործակցության համապարփակ երկարաժամկետ համաձայնագիր «BRICS» գագաթաժողովի շրջանակում։
Ջալալին նշել է, որ Իրանի անդամակցությունը «BRICS»-ին դիվանագիտական աշխատակազմի հաջողությունն է։ Ռուսաստանը շատ միջոցառումներ է նախատեսել 2024թ. այդ խմբի համար։ Նրա խոսքով՝ համաձայնագիրը կստորագրվի Իրանի եւ ՌԴ նախագահների միջեւ Կազանում, «BRICS» գագաթաժողովի շրջանակում, կախված ընթացակարգային գործընթացների ավարտից։ Նա հիշեցրել է, որ համաձայնագիրը պետք է արժանանա երկու երկրների խորհրդարանների հավանությանը, որպեսզի իրավաբանական ընթացակարգ անցնի։
«BRICS» գագաթաժողովը տեղի կունենա ՌԴ Կազան քաղաքում, հոկտեմբերի 22-24-ին։
