Վենեսուելայի նախագահը TikTok-ին և Instagram-ին մեղադրել է երկրում ատելություն սերմանելու մեջ
Վենեսուելայի նախագահ Նիկոլաս Մադուրոն TikTok-ին և Instagram-ին մեղադրել է երկրում ատելություն սերմանելու մեջ։
«Ես ուզում եմ հարցնել TikTok ընկերությանը, արդյո՞ք, այն ԱՄՆ-ում և Եվրոպայում թույլ է տալիս նման ֆաշիստական և ատելություն հրահրող տեսանյութերի ցուցադրումը: Ոչ։ Նրանք ցանկանում են Վենեսուելան վարակել ատելությամբ և պառակտմամբ։ TikTok-ը իրավական պատասխանատվություն է կրում այն ամենի համար, ինչ նրանք անում են Վենեսուելայի դեմ, ինչպեսև Instagram-ը», - ասել է Մադուրոն իր աջակիցների երթի ժամանակ։
Ինչպես նշել է Վենեսուելայի առաջնորդը, վերջին օրերին TikTok-ում լայն տարածում են գտել Վենեսուելայի ներկայիս կառավարության կողմնակիցների նկատմամբ բռնության կոչերով տեսանյութերը։
Հուլիսի 28-ին Վենեսուելայում նախագահական ընտրություններ էին անցկացվել։ Ինչպես հայտարարել էր երկրի Ազգային ընտրական խորհուրդը՝ քվեաթերթիկների գրեթե 97%-ը հաշվելուց հետո, Մադուրոյի օգտին քվեարկել էր ընտրողների 51,95%-ը, իսկ նրա հիմնական մրցակից Էդմունդո Գոնսալեսի օգտին՝ 43,18%-ը։ Ընդդիմության առաջնորդներից մեկը՝ Մարիա Կորինա Մաչադոն, արդեն ընտրությունների օրը հայտարարել էր, որ Գոնսալեսի թիմը չի ճանաչի ընտրություններում իր պարտությունը։
Հաջորդ օրը Կարակասի կենտրոնում բողոքի ցույցեր ու անկարգություններ սկսվեցին։ Վենեսուելայի իշխանությունների տվյալներով, հրկիզման և այլ իրավախախտումների համար ձերբակալվել է անկարգություններին մասնակից ավելի քան 1000 մարդ, վիրավորվել է ավելի քան 70 իրավապահ, իսկ երկու զինվորական սպանվել է։
