Ո՞վ է վճարել Փաշինյանի և Բեռլինում ընտանիքի հանգստի համար. կառավարությունը պարզաբանել է. Sputnik Արմենիա

ՀՀ վարչապետ Նիկոլ Փաշինյանը` Բեռլինում «Եվրո-2024»–ի եզրափակիչ հանդիպմանը ներկա գտնվելու ճանապարհածախսը, ինչպես նաև կեցության հավելյալ օրերի և ընտանիքի անդամների համար վճարել է սեփական միջոցներից։ Այս մասին Sputnik Արմենիայի հարցմանն ի պատասխան հայտնել են ՀՀ վարչապետի աշխատակազմի հասարակայնության հետ կապերի վարչությունից։

Բանն այն է, որ սոցցանցերի հայկական տիրույթում բուռն քննարկման առարկա էր դարձել Նիկոլ Փաշինյանի ներկայությունը տիկնոջ և որոշ պաշտոնյաների հետ ԵԱ–ի եզրափակիչին։ Խոսվում էր նաև Գերմանիայի մայրաքաղաքում Փաշինյանի, կնոջ և կրտսեր դստեր` Արփիի հանգստի մասին։ ԶԼՄ–ներում նույնիսկ տեղեկություններ են հայտնվել, որ այցն ու արձակուրդը վճարվել են պետբյուջեից։

ՀՀ կառավարությունից լրատվականին հայտնել են, որ Գերմանիայի մայրաքաղաք այցը պլանավորվել է ՈւԵՖԱ–ի նախագահ Ալեքսանդր Չեֆերինի հրավերից հետո։ Թե երբ է հրավերը ստացվել՝ կառավարությունից հստակ պատախսան չեն տվել։ Միևնույն ժամանակ ընդգծել են` ճանապարհածախսը վարչապետը կատարել է իր հաշվին։

Նրան ուղեկցող պատվիրակության անդամների օրապահիկը և գիշերավարձը վճարվել է պետբյուջեից այն չափով, որը նախատեսվում է կառավարության 2005 թվականի դեկտեմբերի 29-ի որոշմամբ։

ՀՀ կառավարության որոշմամբ` պետական աշխատողների համար, դեպի Գերմանիա, մասնավորապես Բեռլին գործուղվելու համար ծախսն օրապահիկի դեպքում կազմում է 90 եվրո, իսկ գիշերավարձի դեպքում` 134 եվրո մեկ օրվա համար։

«Եվրո 2024-ի եզրափակիչ հանդիպմանը ՀՀ վարչապետը տիկնոջ հետ, ինչպես նաև Արայիկ Հարությունյանը ներկա են գտնվել ՈՒԵՖԱ-ի նախագահի հրավերով, որի համար գումար չի վճարվել։

Նշենք, որ հուլիսի 14-ին ՀՀ վարչապետ Նիկոլ Փաշինյանն ընտանիքի անդամների` կնոջ` Աննա Հակոբյանի և կրտսեր դստեր` Արփիի հետ թռել էր Բեռլին` ֆուտբոլի «Եվրո 2024»-ի եզրափակիչ Իսպանիա–Անգլիա խաղին հետևելու անմիջապես մարզադաշտից։ Փաշինյանն այդ օրը հայտնել էր, որ հանդիպել է ՈւԵՖԱ–ի նախագահ Ալեքսանդր Չեֆերինի հետ, որն էլ հրավիրել էր նրանց Բեռլին` խաղը դիտելու։