էկոնոմիկայի նախարարը՝ տնտեսության դիվերսիֆիկացման մասին
Տնտեսության դիվերսիֆիկացումը չի ենթադրում մեկ խոշոր առևտրային գործընկերոջ փոխարինումը մեկ այլով, այլ նշանակում է առևտրաշրջանառության բազմակողմանի աճ: Այս մասին Կառավարության նիստից հետո լրագրողների հետ զրույցում նշել է էկոնոմիկայի նորանշանակ նախարար Գևորգ Պապոյանը:
«Տնտեսության դիվերսիֆիկացումը շարունակական գործընթաց է, որը պետք է մշտապես տեղի ունենա: Իմ հարցազրույցներում նշել եմ, որ տնտեսության դիվերսիֆիկացումն այն իրավիճակը չէ, երբ խոշոր առևտրային գործընկերոջդ փոխարինում ես մեկ ուրիշով: Դա այն է, երբ ունես մի քանի խոշոր և բազմաթիվ ավելի փոքր առևտրային գործընկերներ: Տնտեսության դիվերսիֆիկացումը մի գործընթաց է, որի արդյունքում Հայաստանը համաչափ կախված է լինում աշխարհից, իսկ մյուս երկրներն էլ՝ իրենց չափով համաչափ կախված են լինում Հայաստանից: Այսինքն, դա փոխադարձ գործընթաց է: Բոլոր ուղղություններով պետք է ավելացնենք մեր առևտրաշրջանառությունը»,- ասել է Պապոյանը:
Ընդունելով, որ Հայաստանն ունի փակ սահմաններ, ինչը շատ լուրջ խոչընդոտ է տնտեսության զարգացման համար՝ նախարարը միաժամանակ ընդգծել է, որ ինքն ու իր թիմը դա համարում են դժվար մարտահրավեր, ուստի անընդհատ և ամենօրյա աշխատանքով փորձելու են նոր ուղիներ գտնել Հայաստանի տնտեսության զարգացման համար:
Ըստ նրա՝ վարչապետի վերջին այցը Եգիպտոս հետապնդում էր նաև նման նոր ուղիներ գտնելու նպատակ:
