Ալեքսանդր Ստուբն ընտրվեց Ֆինլանդիայի նախագահ

Ֆինլանդիայի նախկին վարչապետ Ալեքսանդր Ստուբը հաղթել է նախագահական ընտրությունների երկրորդ փուլում՝ բոլոր քվեաթերթիկների հաշվարկից հետո հավաքելով ձայների 51,6%-ը, հայտնում է Yle պորտալը։

Նախագահի երկրորդ հավակնորդ, Ֆինլանդիայի ԱԳՆ նախկին ղեկավար Պեկկա Հաավիստոն ստացել է ձայների 48,4%-ը։

Հունվարի 28-ին կայացած ընտրությունների առաջին փուլից հետո Ստուբը և Հաավիստոն անցել են երկրորդ փուլ՝ համապատասխանաբար 28,3% և 25,8% արդյունքներով։ Նախագահական քարոզարշավին ընդհանուր առմամբ մասնակցել է 9 թեկնածու։

Ըստ օրենքի՝ նախագահն ընտրվում է 6 տարի ժամկետով՝ ոչ ավելի, քան երկու անընդմեջ ժամկետով։ Ստուբը կդառնա պետության տասներեքերորդ ղեկավարը։ Նա պաշտոնը կստանձնի մարտի 1-ից։

Ալեքսանդր Ստուբը զբաղեցրել է մի շարք նախարարական պաշտոններ երկրի կառավարություններում։ 2008 թվականին արտգործնախարարի պաշտոնում նշանակվելուց հետո նա իրեն դրսևորեց որպես ՆԱՏՕ-ի ակտիվ աջակից։ 2014-2015 թվականներին նա գլխավորել է Նախարարների կաբինետը։ 2017 թվականին նա հայտարարեց, որ ընդմիշտ հեռանում է քաղաքականությունից։

2023 թվականին Ստուբը, շատերի համար անսպասելիորեն, հայտարարեց պետության ղեկավարի պաշտոնի իր հավակնությունների մասին։

Ֆինլանդիան նոր նախագահ է ընտրում 2023 թվականի ապրիլին ՆԱՏՕ-ին անդամակցելուց հետո առաջին անգամ։ Ի տարբերություն շատ այլ արևմտյան երկրների պետությունների ղեկավարների, Ֆինլանդիայի նախագահը կարևոր դեր է խաղում արտաքին քաղաքականության մշակման և իրականացման գործում, ներկայացնում է երկիրը ՆԱՏՕ-ում և գլխավորում է պաշտպանական ուժերը։

Նախընտրական քարոզարշավի ընթացքում Ստուբը իրեն դրսևորեց որպես եվրատլանտյան և հակառուսական կուրսի ակտիվ ջատագով։ Նա դեմ էր Ռուսաստանի անդամակցությանը ՄԱԿ-ի Անվտանգության խորհրդին, ինչպես նաև իր արևելյան հարևանի հետ լիարժեք հարաբերություններին, քանի դեռ ռուսական զորքերը գտնվում են Ուկրաինայում: Աջակցել է ռուսական սառեցված ակտիվների բռնագրավմանը և դրանց օգտագործմանը Կիևին օգնելու համար։