Ակնայի անցակետի մոտ ասկերանցիները հերթապահություն են անում. Ասկերանի ղեկավար

Ասկերանցիները Ակնայի անցակետի մոտ վրաններ են տեղադրել և գիշերվանից սկսած հերթապահություն են անում: Այս մասին NEWS.am-ի հետ զրույցում ասել է Ասկերանի շրջվարչակազմի ղեկավար Համլետ Ապրեսյանը:

«Բնակիչներն այժմ էլ այնտեղ են ու չեն պատրաստվում թույլ տալ, որ ադրբեջանական որևէ բեռ մտնի Արցախ: Մենք այդ հատվածում ունենք ոստիկանական հենակետ, դրանից մի քիչ ներքև՝ դեպի Ակնա ռուս խաղաղապահ ուժերի հենակետն է, ադրբեջանական կողմը դեռ չի անցել ռուսական հենակետը, ռուսական կողմը չի թողնում անցնեն»,- ասել է Համլետ Ապրեսյանը:

Լրատվամիջոցի հետ զրույցում Համլետ Ապրեսյանն ասել է, որ արցախցիները ադրբեջանական բեռներից հեռու են մոտ 400 մետր:

«Շուրջ 100 բնակիչ կլինեն որ հերթապահություն են անում, իսկ գիշերը մի քանի հարյուրի կհասնեին»,- ասել է նա:

Ինչպես նշում է կայքը, Համլետ Ապրեսյանը շեշտել է, որ Ադրբեջանի կողմից ոչ մի օգնություն Արցախին պետք չէ. «Մենք չենք ուզում, թող բացեն Լաչինի միջանցքը: Մենք տասնամյակներ պայքարել ենք, կռվել ենք, այսքան զոհեր ենք ունեցել, արյուն ենք թափել, որ այսօր թշնամուց հաց ստանա՞նք, դա արդեն դավաճանություն է մեր զոհված տղաների առջև»: