Ձերբակալվել է Երևանում դաժան սպանություն կատարած 26-ամյա երիտասարդը

Երևանում կատարված դաժան սպանությունը բացահայտվել է։ Այս մասին տեղեկանում ենք ՆԳՆ ոստիկանությունից։ 

«Օգոստոսի 20-ին, ժամը 17.04-ին, 911 ծառայությունից ՆԳՆ ոստիկանության օպերատիվ կառավարման կենտրոն հաղորդում է ստացվել, որ Կողբացու փողոցի շենքերից մեկի մի բնակարանում հրդեհ է: Նշված հասցե մեկնած ՆԳՆ փրկարար ծառայության աշխատակիցները հրդեհաշիջման աշխատանքներ կատարելուց հետո հայտնաբերել են դիակ»,- ասվում է հրապարակման մեջ:

Ոստիկանությունից հայտնում են, որ դիակի վրա կտրած-ծակած վնասվածքներ են հայտնաբերվել։ Ձեռնարկված միջոցառումների շնորհիվ պարզվել է դիակի ինքնությունը՝ Արմավիրի մարզի 28-ամյա բնակիչ: Պարզել են նաև հանցագործության մեջ կասկածվողի ինքնությունը:

«Ըստ նախնական տվյալների՝ 26-ամյա եիտասարդը սուր ծակող-կտրող գործիքով բազմաթիվ հարվածներ է հասցրել 28-ամյա քաղաքացուն՝ պատճառելով մահ, այնուհետև հետքերը թաքցնելու նպատակով հրդեհել է բնակարանը։ Օգոստոսի 21-ին, ժամը 02.40-ին, կասկածյալը Բավրայի սահմանային անցակետում հայտնաբերվել, ձերբակալվել և տեղափոխվել է ՆԳՆ ոստիկանության Կենտրոնական բաժին: Նա ներկայացվել է վարույթն իրականացնող մարմին»,- նշվում է հրապարակման մեջ:

Հիշեցնենք՝ ավելի վաղ հգայտնել էինք, որ Երևանում դաժան սպանություն է տեղի ունեցել․ դանակի մի քանի հարվածով սպանել են 28-ամյա տղամարդու։