Շոգերի պատճառով Երևանում շտապօգնության կանչերի թիվը կտրուկ ավելացել է
Այս ամռան ամենաշոգ օրերին՝ օգոստոսի 10-14-ին, Երևանի շտապօգնություն կանչերի թիվը կտրուկ աճել է։ Այս մասին Sputnik Արմենիայի թղթակցին ասել է «Շտապօգնություն» ՓԲԸ-ի տնօրեն Ռուբեն Գրիգորյանը։
«Եթե մինչև օգոստոսի 10-ը շտապօգնություն օրական 750 կանչ էր ստացվում, ապա շոգի պիկին այդ թիվը հասել է 800-830-ի։ Հիմնականում զանգերը կապված են սիրտ-անոթային համակարգի հիվանդությունների, ճնշման հետ կապված խնդիրների հետ։ Եղել են նաև ջերմային հարվածի դեպքեր, ճիշտ է՝ հազվադեպ»,- նշել է նա։
Լրատվամիջցը հայտնում է, որ Գրիգորյանի խոսքով՝ հազվագյուտ կանչեր են կապված եղել սննդային թունավորման հետ։ «Շտապ օգնության» տնօրենը համաքաղաքացիներին խորհուրդ է տալիս շատ ջուր խմել, խուսափել տապակած ուտելիքից, միրգ ու բանջարեղեն օգտագործել:
Հիշեցնենք՝ ավելի վաղ հիդրոօդերևութաբանության և մոնիթորինգի կենտրոնի փոխտնօրեն Գագիկ Սուրենյանը հայտնել էր, որ Հայաստանում օդի ջերմաստիճանի կտրուկ բարձրացում է գրանցվել օգոստոսի 10-14-ը։ Արաբական թերակղզուց հզոր ջերմային հոսքերի ներթափանցմամբ պայմանավորված ժամը 16:00-18:00-ն Երևանում և Արարատյան դաշտում ջերմաստիճանը հասել է +40-ից +42-ի:
