ԼՈՒՍԱՆԿԱՐՆԵՐ․ Արցախում կրակել են հացահատիկահավաք կոմբայնի ուղղությամբ․ քաղաքացուն հաջողվել է փրկվել
Ադրբեջանական ԶՈւ–ն Արցախում կրակել են հացահատիկահավաք կոմբայնի ուղղությամբ։ Այս մասին տեղեկանում ենք Արցախի ՆԳՆ-ից։
«Օգոստոսի 15-ին ոստիկանության Մարտունու շրջանային բաժնում հաղորդում է ստացվել, որ ժամը 19:30-ի սահմաններում, Ավդուռ գյուղի վարչական տարածքի «Գոմեր» կոչվող տեղամասում հարակից ադրբեջանական մարտական դիրքերից հրաձգային զենքերով կրակել են հացահատիկահավաք կոմբայնի ուղղությամբ, որը վարում էր Մյուրիշեն գյուղի բնակիչ Մ.Ա.-ն:
Բարեբախտաբար, քաղաքացուն հաջողվել է փրկվել, վնասվել է միայն կոմբայնը»,- ասվում է հրապարակման մեջ։
Նշվում է, որ կրակոցների պատճառով դադարեցվել են գյուղատնտեսական աշխատանքները: Հաղորդումը փոխանցվել է ռուսական խաղաղապահ զորակազմին։
