«Գնամ, տեսնեմ` ինչ են խաբում». պատերազմի մասնակիցներին կառավարությունից հանդիպման են հրավիրել

Երևանի Հանրապետության հրապարակում բողոքի ակցիա իրականացնող պատերազմի մասնակիցներից մի քանիսին ՀՀ կառավարությունից կանչել են հանդիպման։ Այս մասին լրագրողների հետ զրույցում ասել է «Խաչակիրներ» ջոկատի հրամանատար, գնդապետ, «Խաչակիրներ» ռազմահայրենասիրական ՀԿ–ի նախագահ Սարգիս Պողոսյանը։

«Մենք պատերազմ ենք ուզում, թող մեզ զենք տան։ Կանչել են կառավարությունից։ Գնամ, տեսնեմ` ինչ են խաբում, գամ` ձեզ ճիշտը կասեմ»,– նշել է Պողոսյանը։

Նա չի մանրամասնել, թե ում հետ են հանդիպելու, սակայն խոստացել է վերադառնալուն պես մանրամասն ասել ամեն ինչ։

Նշենք, որ արդեն որոշ ժամանակ է «Խաչակիրներ» ջոկատի անդամներն ու նրանց աջակիցները կառավարության շենքի մոտ են։ Նրանք պահանջում են Լաչինի միջանցքը բացելու և Արցախում հումանիտար աղետը կանխելուն ուղղված քայլեր ձեռնարկել, իսկ այդ ամենը չկատարելու պարագայում` զինել իրենց, որպեսզի թեկուզ զոհվելու գնով, կարողանան բացել Լաչինի միջանցքը։

Հիշեցնենք` 2022–ի դեկտեմբերի 12-ին քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակեցին Արցախը Հայաստանին կապող Ստեփանակերտ-Գորիս մայրուղին, որտեղից հեռացան ապրիլի 28-ին, քանի որ ապրիլի 23-ին Ադրբեջանն անցակետ տեղադրեց Լաչինի ճանապարհի վրա` այն ամբողջությամբ առնելով իր վերահսկողության տակ։ Արցախը զրկվել է նաև Հայաստանից մատակարարվող գազից և էլեկտրաէներգիայից։