Սկանդալ Ստալինի մասին Պուտինի խոսքերի պատճառով. Լեհաստանում ՌԴ դեսպանը ԱԳՆ է կանչվել

Լեհաստանում ՌԴ դեսպանին կանչել են ԱԳՆ, Պուտինի՝ Ստալինի կողմից Լեհաստանին հողերը փոխանցելու մասին խոսքերի պատճառով:

Լեհաստանի վարչապետ Մաթեուշ Մորավիեցկին հայտարարել է, որ արտաքին գործերի նախարարություն է հրավիրվել Ռուսաստանի դեսպան Սերգեյ Անդրեևը։ 

Հիշեցնենք, որ ՌԴ նախագահ Վլադիմիր Պուտինը երեկ, անվտանգության խորհրդի նիստում ասել էր, որ Լեհաստանը ԽՍՀՄ-ի եւ Իոսիֆ Ստալինի որոշման շնորհիվ ստացել է «զգալի հողեր արեւմուտքում, Գերմանիայի հողերը»։ ՌԴ նախագահի խոսքով՝ Լեհաստանի առաջնորդները «հաշվում են ՆԱՏՕ-ի հովանու ներքո կոալիցիա ստեղծելու, Ուկրաինայի ռազմական հակամարտությանը միջամտելու և ավելի մեծ կտոր պոկելու վրա», այսինքն՝ «բելառուսական հողերի մի մասը ստանալու»: 

«Ստալինը ռազմական հանցագործ էր, որը պատասխանատու էր հարյուր հազարավոր լեհերի մահվան համար: Պատմական ճշմարտությունը չի քննարկվում։ Ռուսաստանի Դաշնության դեսպանը կկանչվի Արտաքին գործերի նախարարություն»,- Twitter-ում գրել է Մորավիեցկին։