Վլադիմիր Զելենսկին պատժամիջոցներ է սահմանել Georgian Airways-ի դեմ
Ուկրաինայի նախագահ Վլադիմիր Զելենսկին 10 տարի ժամկետով պատժամիջոցներ է սահմանել վրացական Georgian Airways ավիաընկերության դեմ, որը վերսկսել է ուղիղ չվերթները դեպի Ռուսաստան, հայտնում է ՏԱՍՍ-ը։
Սահմանափակումները, մասնավորապես, նախատեսում են ակտիվների արգելափակում, առևտրային գործառնությունների դադարեցում, Ուկրաինայի տարածքով թռիչքների և տարանցման դադարեցում, տնտեսական և ֆինանսական պարտավորությունների կատարման կասեցում, լիցենզիաների և այլ թույլտվությունների չեղարկում։
Անձնական պատժամիջոցներ են սահմանվել նաև ավիաընկերության հիմնադիր Թամազ Գաիաշվիլիի նկատմամբ։
Ընդհանուր առմամբ, Ուկրաինան հուլիսի 1-ին ընդլայնել է պատժամիջոցները 192 ֆիզիկական անձանց, հիմնականում Ռուսաստանի քաղաքացիների և 291 ընկերությունների և իրավաբանական անձանց նկատմամբ:
Վրացական Georgian Airways ավիաընկերության հիմնադիր Թամազ Գաիաշվիլին հայտարարել է, որ իրեն չեն հետաքրքրում Ուկրաինայի նախագահ Վլադիմիր Զելենսկու կողմից իր և իր ձեռնարկության դեմ սահմանված պատժամիջոցները։
«Ինձ ընդհանրապես չի հետաքրքրում, թե ով ինչ է ներկայացնում իմ դեմ։ Ընդհանուր առմամբ, ես այս թեման կթողնեմ առանց մեկնաբանության»,- ասել է Գաիաշվիլին։
