ԼՈՒՍԱՆԿԱՐՆԵՐ. «Մոսկովյան փողոցում տեղադրած սակուրաներից մեկը կրկին չորացավ». Քրիստինե Վարդանյան
Մոսկովյան փողոցում տեղադրած ու ամենօրյա խնամքով ապահովված սակուրաներից մեկը կրկին չորացավ (այս տարի արդեն երրորդն է): Ֆեյսբուքյան իր էջում նման գրառում է կատարել Երևանի քաղաքապետարանի ավագանու անդամ և բնապահպան Քրիստինե Վարդանյանը և կից լուսանկարներ հրապարակել:
«Բնությանը կամքդ չես թելադրի։ Սակուրո սակուրինի, բլեֆանտո բամբինի»,- գրել է նա:
Հիշեցնենք` մարտի 23-ին Երևանի քաղաքապետարանի «Կանաչապատում և շրջակա միջավայրի պահպանություն» ՀՈԱԿ-ը հայտարարեց «ծերացած, ֆունկցիոնալության ավարտին մոտ ծառերը կենսունակ, գեղազարդ ծառերով փոխարինելու աշխատանքների» մեկնարկի մասին։ Աշխատանքները մեկնարկել են Կասկադից, և այնտեղ հաստաբուն ծառերի հատումը քաղաքացիների շրջանում բողոքի ալիք բարձրացրեց։
Պետական գնումների armeps.am համակարգի տվյալներով՝ 2023 թվականի փետրվարի 14-ին ՀՈԱԿ-ը գնման պայմանագիր է կնքել «Կանաչ հեքիաթ» ՍՊԸ-ի հետ։ Ընկերությունը պարտավորվել է այդ գումարի դիմաց մատակարարել ընդհանուր 150 հատ սակուրա ծառատեսակի տնկի։
Ըստ պայմանագրի հավելվածի՝ ՀՈԱԿ-ը ձեռք է բերել 100 հատ «սակուրա ճապոնական ռոյալ բուրգունդի» տեսակի տնկի՝ մեկ հատը 72 490 դրամով, 30 հատ «սակուրա ճապոնական սերուի աթա ամանոգավա» տնկի՝ մեկ հատը 62 490 դրամով, 20 հատ «սակուրա ճապոնական սերիուաթա կիկու շիդարու» տեսակի տնկի՝ մեկ հատը 65 490 դրամով։
Այսինքն՝ Երևանի քաղաքապետարանը 150 սակուրայի համար պետք է վճարեր 10 մլն 433 հազ․ 500 դրամ։ Սակայն փետրվարի 27-ին ՀՈԱԿ-ի և «Կանաչ հեքիաթ» ՍՊԸ-ի միջև կնքվել է համաձայնագիր, որով 150-ի փոխարեն մատակարարվելու է 70 սակուրա․ 50 հատ՝ յուրաքանչյուրը 72 490 դրամով և 20 հատ՝ յուրաքանչյուրը 65 490 դրամով։ Պայմանագրի ընդհանուր արժեքը կազմել է 4 մլն 934 հազ․ դրամ։
