Փորվել է շուրջ 7000 մետր. վրացական նախագիծը կկրճատի Լարս տանող ճանապարհը

Վրաստանում հաշվետվություն են ներկայացրել տարածաշրջանում ամենաերկար և աշխարհի 6 ամենամասշտաբային թունելներից մեկի շինարարության ընթացքի մասին:

Վրաստանի տարածաշրջանային զարգացման և ենթակառուցվածքի նախարարության ավտոճանապարհների դեպարտամենտի տվյալներով` Խաչի լեռնանցքում գտնվող 9 կիլոմետրանոց թունելից արդեն 6 760 մետրը փորվել է:

Խոսքը Խաչի լեռնանցքում գտնվող թունելի մասին է, որը Մցխեթ-Ստեփանծմինդա-Լարս ավտոճանապարհի ամենավտանգավոր հատվածի (Գուդաուրի-Կոբի)` շրջանցիկ ճանապարհի մի մասն է:

Նշվում է, որ տարհանման թունելի 3 կմ 820 մետրն արդեն փորվել է։ 15 մետր տրամագծով թունելով երթևեկությունը կիրականացվի 2 ուղղությամբ, 3 գծով: Յուրաքանչյուր 500 մետրում կլինեն տարհանման ելքեր։

Նախագծով նախատեսվում է կառուցել 23 կմ երկարությամբ երկշերտ բետոնե ճանապարհ, 5 կամուրջ, 5 թունել, ինչպես նաև մեկ կամրջի վերանորոգման աշխատանքներ իրականացնել: Գոյություն ունեցող ճանապարհի երկարությունը 34 կմ է, թունելը կկրճատի այն 11 կմ-ով: Դա նաև թույլ կտա անխափան երթևեկություն ապահովել ամենավտանգավոր հատվածում: Եթե այժմ այն անցնում են ավելի քան 1 ժամում, ապա ծրագրի ավարտից հետո կպահանջվի 15 րոպե։

Արդյունքում Թբիլիսիից Ստեփանծմինդա (ՌԴ-ի հետ սահմանին) ճանապարհի ժամանակը 2 ժամ 30 րոպեից կկրճատվի մինչև 1 ժամ 45 րոպե։ Նախագծի ընդհանուր արժեքը 1,2 մլրդ լարի է։

Հիշեցնենք, որ նախագիծը պետք է ավարտվեր 2022 թվականին, սակայն համաճարակի պատճառով ժամկետը փոխվեց։ Թբիլիսիում պնդում են, որ նախագիծը կավարտվի 2024 թվականին։