Ձերբակալվել են Սիրիայում ծայրահեղ ահաբեկչական կազմակերպությունների կազմում կռվող Ադրբեջանի քաղաքացիներ
Ձերբակալվել են արտասահմանում ապօրինի զինված կազմավորումներին մասնակցած ու դրանց անդամ հանդիսացող Ադրբեջանի քաղաքացիներ:
Այս մասին հայտնում է Ադրբեջանի Պետական անվտանգության ծառայությունը՝ նշելով, որ ուսումնասիրությունների արդյունքում պարզվել և միջազգային հետախուզման մեջ են մտել Ադրբեջանի քաղաքացիներից կազմված խմբի անդամները, ովքեր զինված ընդհարումներին մասնակցելու նպատակով գործել են խմբերի կազմում։
Ահաբեկչական այս խմբերը կրոնական ատելության, կրոնական արմատականության և կրոնական մոլեռանդության հիման վրա անօրինական կերպով Սիրիայի տարածք են անցել, ներգրավվել են Իդլիբ քաղաքի հատուկ ճամբարներում անցկացվող զորավարժություններին: Նրանք տարբեր տեսակի հրազենի կիրառման դասընթացներ են անցել և մասնակցել մարտերին «Թայֆաթուլ Մանսուրա» անօրինական զինված խմբավորման կազմում։
Հարուցված քրեական գործով ձեռնարկված օպերատիվ-հետախուզական միջոցառումներով պարզվել են այն վայրերը, որտեղ թաքնվել են վերոնշյալ հանցավոր արարքները կատարած Ադրբեջանի 13 քաղաքացիները: Հրապարակվել են բոլորի անունները։
Միջազգային հետախուզման համար իրավական փոխօգնության ընթացակարգի շրջանակներում նրանք կալանավորվել են և տեղափոխվել Ադրբեջան։
Վերոնշյալ անձինք քրեական պատասխանատվության են ենթարկվել որպես մեղադրյալներ: Դատարանի որոշմամբ նրանց նկատմամբ խափանման միջոց է ընտրվել կալանավորումը։
