Կոսովոն արգելել է սերբական պետհամարանիշներով մեքենաների մուտքը երկիր

Կոսովոյի կառավարությունն այս գիշեր որոշում է կայացրել արգելել սերբական պետհամարանիշներով մեքենաների մուտքը Կոսովո, հայտարարել է կառավարության խոսնակ Պերպարիմ Կրիեզուն: Այս մասին գրում է Kosov Online-ը։

Կրիեզուն «Ազատ Եվրոպա» ռադիոկայանին ասել է, որ կառավարությունը Սերբիայի իշխանությունների կողմից Կոսովոյի ոստիկանության երեք անդամների ձերբակալությունից հետո որոշել է բարձրացնել սահմանային հսկողության մակարդակը։ 

«Անվտանգության նկատառումներից ելնելով` հաստատությունները որոշել են բարձրացնել սահմանային հսկողության մակարդակը, ուստի, որպես հրատապ քայլ, որոշվել է արգելել սերբական պետհամարանիշներով մեքենաների մուտքը Կոսովո, մինչդեռ անվտանգության կառույցների կողմից իրավիճակի վերլուծությունը շարունակվում է: Իրավապահ կառույցների առաջարկության հիման վրա կձեռնարկվեն հավելյալ գործողություններ»,- պարզաբանել է նա։