Զելենսկին սպառնացել է, որ Կիևը չի մասնակցի ՆԱՏՕ-ի գագաթնաժողովին
Ուկրաինայի նախագահ Վոլոդիմիր Զելենսկին սպառնացել է, որ Կիևը չի մասնակցի Վիլնյուսում կայանալիք ՆԱՏՕ-ի գագաթնաժողովին, եթե այնտեղ խոստումներ չհնչեն Ուկրաինային դաշինքում ընդունելու մասին:
"Ասա ինձ, թե քանի կյանք արժե մեկ արտահայտությունը Վիլնյուսի գագաթնաժողովում: Ուկրաինան ՆԱՏՕ-ում կլինի՞ հակամարտությունից հետո։ Եթե մեզ այնտեղ չեն տեսնում և Վիլնյուսում մեզ ինչ-որ ազդանշան չեն տալիս, ես կարծում եմ, որ Ուկրաինան անելիք չունի գագաթնաժողովում", - ասել է Զելենսկին WSJ-ի լրագրողի հետ զրույցում ։
Հիշեցնենք՝ փետրվարի 24-ի լուսադեմին՝ ժամը 03:40-ին Ուկրաինայի Լուգանսկի շրջանում հայտնվեցին ռուսական առաջին տանկերը։ Ժամը 04:35-ին Սումիի շրջանում ընկան առաջին հրթիռները։ Մոսկվայի ժամանակով 04:50-ին Վլադիմիր Պուտինը հրապարակեց տեսաուղերձ, որով հայտնեց, որ Ռուսաստանը «հատուկ ռազմական գործողություն» է սկսել Ուկրաինայում։ Ուկրաինայի արևմտյան դաշնակիցներն ամիսներ շարունակ զգուշացնում էին Կիևին, որ Ռուսաստանը ծրագրում է լայնամասշտաբ պատերազմ: Այնուամենայնիվ, Պուտինի որոշումը շոկային եղավ շատերի համար ամբողջ աշխարհում: Արդեն ավելի քան մեկ տարի է, ինչ լայնամասշտաբ պատերազմ է ընթանում։ Տասնյակ հազարավոր զինվորներ և խաղաղ բնակիչներ են սպանվել, քաղաքներ հրթիռակոծվել, ռազմական հանցագործություններ տեղի ունեցել:
