«Ջալալ Հարությունյանը համաձայնություն տվել է ներկա լինելու քննիչ հանձնաժողովի նիստին»․ Քոչարյան

ԱԺ պաշտպանության ու անվտանգության հարցերի մշտական հանձնաժողովի նախագահ Անդրանիկ Քոչարյանը լրագրողների հետ զրույցում հայտնեց, որ Արցախի ՊԲ նախկին հրամանատար Ջալալ Հարությունյանը համաձայնել է մասնակցել 44-օրյա պատերազմի հանգամանքներն ուսումնասիրող քննիչ հանձնաժողովի նիստին։ 

«Ես զրույց ունեցել եմ Ջալալ Հարությունյանի հետ, և այս լիագումար նիստից հետո կկազմակերպենք հանձնաժողովի և ՊԲ նախկին հրամանատարի հանդիպումը։ Նա համաձայնություն տվել է ներկա լինելու քննիչ հանձնաժողովի նիստին և պատասխանելու հարցերին», - ասաց Քոչարյանը։

Նա նշեց` հանձնաժողովում ընտրել են հրավիրվող պաշտոնյաների հերթականությունը. իրենց հարցերին պետք է պատասխանի նաև երկրի թիվ մեկ պաշտոնյան։

«Շատ քիչ մարդիկ են, որ հանձնաժողովի նիստին ներկայանալու համաձայնություն չեն տվել, օրինակ` Տիրան Խաչատրյանը, Վարդան Օսկանյանը, որը տարբեր հարթակներում խոսում է բանակցային գործընթացների մասին, բայց հիմնական հարթակը, որտեղ արժեր, որ նա գար ու խոսեր, դա քննիչ հանձնաժողովն է։ Ինչպես ասաց Զոհրաբ Մնացականյանը, այս հարթակից չօգտվելը կլինի ախմախություն»,– նշեց Քոչարյանը։