Չավուշօղլուն և Լավրովը կհանդիպեն․ քննարկվելու է նաև հայ-թուրքական հարաբերությունների կարգավորման հարցը
Թուրքիայի ԱԳՆ ղեկավար Մևլութ Չավուշօղլուի հրավերով ապրիլի 6-7-ը ՌԴ ԱԳՆ ղեկավար Սերգեյ Լավրովը կայցելի Թուրքիա՝ մասնակցելու երկկողմ և միջազգային օրակարգի հարցերի լայն շրջանակի բանակցություններին։ Այս մասին հայտնում է ՌԴ ԱԳՆ կայքը։
Այցի ընթացքում կքննարկվեն արդի տարածաշրջանային և միջազգային հարցերի լայն շրջանակ։
«Նախատեսվում է քննարկել նաև Հայաստանի և Թուրքիայի միջև հարաբերությունների վերականգնման, տրանսպորտային հաղորդակցության ապաշրջափակման, տարածաշրջանի հետկոնֆլիկտային վերականգնման հարցերը»,– գրված է հաղորդագրության մեջ։
Նշվում է, որ ԱԳՆ ղեկավարները կքննարկեն նաև թուրք-սիրիական հարաբերությունների կարգավորումը։ Անդրադարձ կկատարվի Անկարային և Դամասկոսին քառակողմ ձևաչափով աջակցություն ցուցաբերելու քայլերին՝ Իրանի՝ որպես «Աստանայի գործընթացի» երաշխավոր երկրի մասնակցությամբ։
