Ադրբեջանի ԱԳՆ-ն հայ-իրանական միությունը «սպառնալիք» է անվանել․ ԶԼՄ-ներ

«Այսօրվա իրանա-հայկական եղբայրությունը սպառնալիք է ստեղծում ամբողջ տարածաշրջանի համար»։ Այս մասին հայտարարել է Ադրբեջանի ԱԳՆ մամուլի ծառայության ղեկավար Այհան Հաջիզադեն, գրում են ադրբեջանական ԶԼՄ-ները։

Այսպիսով նա մեկնաբանել է Իրանի ԱԳՆ պաշտոնական ներկայացուցիչ Նասեր Քանանիի խոսքերն այն մասին, որ Ադրբեջանի իշխանությունները պետք է բացատրեն Իսրայելի հետ իրենց «հակաիրանական համագործակցությունը»: 

Հաջիզադեի խոսքով՝ վերջին շրջանում Իրանից իբր սպառնալիքներ են հնչում Ադրբեջանի հասցեին և «սադրանքներ են թույլ տրվում»: Դրանց թվում Ադրբեջանի ԱԳՆ ներկայացուցիչը նշել է նաև Ադրբեջանի խորհրդարանի պատգամավոր Ֆազիլ Մուստաֆայի դեմ մահափորձը, Հաջիզադեի խոսքով՝ մահափորձի հետքերը «տանում են դեպի Իրան»: 

Ավելի վաղ Իրանի ԱԳՆ ներկայացուցիչը, մեկնաբանելով ադրբեջանա-իսրայելական համագործակցությունը, Իսրայելի ԱԳ նախարար էլի Քոենի խոսքերը «Իրանի դեմ միացյալ ճակատ ձևավորելու» մասին անվանել էր ևս մեկ ապացույց այն բանի, որ Իսրայելը ձգտում է Ադրբեջանի տարածքը վերածել Թեհրանի ազգային անվտանգության սպառնալիքի: