30 տարի անց «Կորեայի ձորը» վերջապես ազատվեց շինարարական աղբից: Այս մասին հայտում է ֆեյսբուքյան օգտատեր Narine Balayan-ը: 

«Նախորդ տարվա ամիսներ տեւած մեր պայքարն իզուր չէր: Ցավոք՝ համաձայնության ընդհանուր եզրեր չգտնելու պատճառով ստիպված եղանք դիմել դատարան, բայց ի վերջո դատարանի միջոցով կարողացանք լուծել խնդիրը: Մեր հարեւանը պատճառած անհանգստության ու հնչեցրած վիրավորանքների համար պատրաստ է անգամ հրապարակայնորեն ներողություն խնդրել:

Շնորհակալ եմ Արաբկիր վարչական շրջանի ղեկավարությանը, պարոն Արամ Ազատյանին, խնդրի բարձրացման առաջին իսկ օրվանից մեր կողքին լինելու համար»,- գրել է նա` կից ներկայացնելով լուսանկարներ: 

Հիշեցնենք, որ մարտի 27-ի Երեւանի քաղաքապետարանում խորհրդակցության ժամանակ  փոխքաղաքապետ Տիգրան Ավինյանն ասել էր Կորեայի ձորում շինաղբի թափման հետ կապված գրություն են  գրել ոստիկանություն եւ արագ արձագանք էր եղել, բայց նա հիմա նորից ահազանգեր է ստանում, որ այդ  պրոցեսը շարունակվում է, ամբողջապես չի դադարել:

Քաղաքապետի խորհրդական Կամո Արեյանն էլ նշել էր.

 «Այս ընթացքում լավագույնս աշխատել է հասարակական կարգի պահպանության ծառայությունը, բավականին թերի է եղել ԳԱՍԿ-ի մասնակցությունն ու աշխատանքը այս ոլորտում:

Շինթույլտվություններում նշված է՝ որտեղ պետք է կառուցապատողը տեղափոխի շինաղբը: Սակայն այս օղակի թույլ վերահսկողության պարագայում կառուցապատողները ձեռք չբերեցին անհրաժեշտ զգաստություն:

Նախորդ շաբաթ ինքս եմ այցելել այդ աղբավայրերը, վարչական շրջանների ղեկավարները բավականին թուլացրել են հերթապահության աշխատանքները, մարդիկ էլ սկսել են առիթից օգտվել»: