Հանցանքի պահին բռնել են «Wall Street Journal»-ի լրագրողին

ՌԴ նախագահի մամուլի քարտուղար Դմիտրի Պեսկովը,  խոսելով «Wall Street Journal»-ի թղթակից Էվան Գերշկովիչի ձերբակալության մասին, ասել է, որ WSJ-ի լրագրողին բռնել են հանցանքի պահին: 

«Դա ԱԴԾ-ի իրավասությունն է, արդեն եղել է Անվտանգության դաշնային ծառայության հայտարարությունը, ավելացնելու բան չունենք»,-ասել է Պեսկովը` պատասխանելով այն հարցին, թե արդյոք Մոսկվան այս գործով համագործակցելու է ամերիկյան հատուկ ծառայությունների հետ։

Պեսկովն ընդգծել է, որ մանրամասներն իրեն հայտնի չեն:

«Մանրամասներին չեմ տիրապետում։ Եվս մեկ անգամ կրկնում եմ` դա հատուկ ծառայությունների իրավասությունն է, որոնք հենց լրտեսների դեմ են պայքարում»,-ասել է Պեսկովը, որին խնդրել են պարզաբանել, թե ինչ է նշանակում հանցանքի պահին բռնելը, երբ մարդը լրտեսության մեջ է մեղադրվում։

ԱԴԾ-ի տվյալներով` Գերշկովիչն ԱՄՆ-ի հանձնարարությամբ պետական գաղտնիք հանդիսացող տեղեկություններ է հավաքագրել ռուսական ռազմարդյունաբերական համալիրի ձեռնարկություններից մեկի գործունեության մասին։

 Գաղտնի տեղեկություններ ստանալու փորձի ժամանակ ամերիկացուն ձերբակալել են Եկատերինբուրգում: